40 BIFF, 4 sundalo patay sa patuloy na sagupaan sa Maguindanao

 

 By  Garry Fuerzas | BomboRadyo, Google

COTABATO CITY - Tumaas pa ngayon ang bilang ng mga sibilyan na nagsilikas dahil sa pinaigting na all out offensive ng militar laban sa Bangsamoro Islamic Freedom Fighters (BIFF) sa lalawigan ng Maguindanao.

Sa pinakahuling engkwentro, apat na miyembro ng BIFF ang nasawi sa Brgy Pusao Mamasapano Maguindanao.

Isa sa mga nasawi na rebeldeng nakasuot pa ng PNP-SAF uniforms.

Narekober sa mga nasawing BIFF ang isang 60 caliber machine gun, dalawang M14 rifles, isang M1 Garand rifle, mga bala at granada.

Apat na sundalo rin ang nasawi kabilang ang isang Army Captain ng 6th Scout Ranger Company na kinilalang si Captain Gromel Auman habang lima rin ang nasugatan sa mga tauhan ng 33rd Infantry Battalion Philippine Army.

Umaabot na rin sa 40 na mga miyembro ng BIFF ang nasawi sa mahigit isang linggong pagtugis ng militar sa mga rebelde sa Maguindanao.

Darating rin ngayong araw sa Maguindanao ang 11th Scout Ranger Company ng Philippine Army mula sa Compostela Vally na tutulong sa pwersa ng 6th ID sa pagtugis sa BIFF.

Tiniyak naman ni 6th ID Public Affairs Chief,Captain Jo-Ann Petinglay ang kaligtasan ng mga bakwit sa nagpaptuloy na operasyon ng militar sa Maguindanao.(Bombo Garry Fuerzas)