'BOI probe sana walang epekto sa BBL' - OPAPP

 Source: BomboRadyo, Google

BACOLOD CITY – Umaasa ang Office of the Presidential Adviser on the Peace Process (OPAPP) na hindi makakaapekto sa pagpasa ng Bangsamoro Basic Law (BBL) ang resulta ng imbestigasyon ng Board of Inquiry (BOI) sa nangyaring engkwentro sa Mamasapano, Maguindanao.

Napag-alama na bukas na sana o sa darating na Lunes ang deadline ng pagsumite ng report ng BOI kay PNP OIC-chief Police Deputy Director General Leonardo Espina na siyang magsusumite naman kay Interior and Local Government Secretary Mar Roxas.

Sa panayam ng Bombo Radyo kay OPAPP Secretary Teresita "Ging" Deles, umaasa ito na hindi iuurong ang target date sa pagpasa sa BBL kung mapatunayang may kasalanan ang Moro Islamic Liberation Front (MILF) sa engkwentro na ikinasawi ng 44 SAF commandos.

Aniya, hayaan sanang ipaubaya sa korte ang nagkasalang kampo dahil naniniwala silang committed pa rin ang MILF sa peace negotiations.

Kampante rin ito sa constitutionality ng BBL at umaasang maisasagawa na ang eleksyon sa Bangsamoro entity sa susunod na taon dahil pagod na rin ang mga residente sa paghihintay.

Sa kabila nito, tiniyak ng kalihim na ipinauubaya nila ang pagpasa ng naturang panukalang batas sa Kongreso na balak na pagtibayin s buwan ng Hunyo.