Kris, sinabing nag-sorry sa kaniya si Erap dahil sa post ng anak na si Jerika

Sinabi ni Kris Aquino na tumawag sa kaniya at nag-sorry si dating Pangulo at ngayo'y Manila Mayor Joseph "Erap" Estrada dahil sa negatibong mensahe na ipinost ng kaniyang anak sa social media laban sa television host-actress.

Sa mensaheng ipinost ni Kris sa kaniyang Instagram account nitong Sabado, ikinuwento ng bunsong kapatid ni Pangulong Noynoy Aquino ang naging pag-uusap umano nila ni Estrada sa telepono.

"I had just finished praying when I got a text from @paulcabral asking if I was still awake. This was followed by a text from mayor @lenalonte asking if it was okay to give my # to president mayor Erap who was in Biñan earlier tonight," saad sa post ni Kris.

Patuloy pa niya, "He called me at 11:08 PM. Pag hello ko pa lang, nag sorry sya agad, 'sorry Kris sa pinagsasabi ng anak ko, ngayon ko lang nalaman, nahihiya ako sa yo, sa pamilya nyo' dinagdag nya na naging mabuti at ma respeto kaming mga magkakapatid sa kanya. 5X nyang inulit yung salitang SORRY, sorry talaga."

Ang tinutukoy ni Estrada na anak niya ay si Jerika Ejercito na nag-post kamakailan sa Facebook na umaatake kay Kris. Bunga ito ng pagdepensa ni Kris sa kapatid niyang si Pangulong Aquino mula sa mga kritisismo dahil sa nangyaring Mamasapano encounter, kung saan 44 na miyembro ng Special Action Force ng Philippine National Police ang nasawi.

BASAHIN: Erap's daughter on Kris: 'Brutally honest...but obviously cannot handle the truth herself'

Saad ni Jerika sa kaniyang post, "Don't dish it out if you can't handle it. Sheesh...every night she bullies her guests on a&a and every morning does it all over again on her show cleverly named kristv her poor guests publicly humiliated...she feels entitled to be BRUTALLY HONEST day in, day out...but obviously cannot handle the truth herself."

Sa kaniyang post nitong Sabado na may larawan ng namayapan niyang ina na si dating Pangulong Cory Aquino at Estrada, sinabi ni Kris na malaking bagay para sa kaniya ang ginawang pagtawag ng dating pangulo pero kung tutuusin ay wala naman daw itong dapat na ihingi ng paumanhin sa kaniya.

Sabi ni Kris: "president mayor, wala ho kayo dapat ihingi ng tawad sa kin. Okay na okay po tayo... Napakalaking bagay po ng effort nyong tawagan ako. Hindi po kinailangan pero MARAMING SALAMAT PO."

Ipinaliwanag din ni Kris ang naging samahan nina Estrada at ng kaniyang ina.

"Naging totoong magkaibigan sila ng Mom ko & I know part of the reason he called me tonight was because of that bond they shared. In the year & a half our Mom battled cancer, president mayor Erap thoughtfully sent food & fruits consistently. I've never forgotten his kindness," ayon sa tv host-actress.



Bago pumanaw noong 2009 dahil sa sakit na cancer, humingi ng paumanhin si Gng. Aquino kay Estrada dahil sa pagsama niya sa mga panawagan na magbitiw noon sa puwesto ang huli na inakusahan ng katiwalian.

Hindi natapos ni Estrada ang kaniyang anim na taong termino matapos siyang mapatalsik sa Palasyo noong 2001 sa pamamagitan ng people power revolution, na naging daan naman para maging pangulo ang noo'y si Vice President Gloria Macapagal-Arroyo. -- FRJ, GMA News